Seten 723 m.o.h. er ein av dei nye postane denne sesongen, her sett ifrå Vikehornet.

Etter nokre år med lite endringar, kjem det no 3 nye postar i fjelltrimmen til Syvde IL. Digital registrering via appen Georeg, og at ein ikkje lenger treng å samle inn besøksbøker, gjer det mogeleg å ha fleire turar å velje mellom. Syvde IL går og over til kalenderår for registrering på same måte som Åheim IL. Denne sesong varer frå 1.9.26 t.o.m. 31.12.27, og deretter blir det kalenderår. Dei som merkar og tilrettelegg for desse turane blir glade når turgåarane skriv namnet sitt i besøksbøkene på postane, men skal ein få poeng i fjelltrimmen må ein registrere med Georeg. Ein finn info om alle turane på heimesida til Syvde IL. under fana Fjelltrimmen.

Tennevatnet, nr 6 på kartet, er ulik dei andre turane fordi ein kan gå på veg heilt fram til turmålet ved det høgste punktet på vegen. Samtidig er dette ein god treningstur i lang motbakke, eit godt alternativ i dårleg, og fin tur om ein er fleire som vil gå i lag og kunne snakke saman. Tennevatnet har vore fjelltrimpost også tidlegare, men då var posten plassert ved naustet nær osen. No er posten på høgste punktet av vegen på same plass der det tidlegare var Stikk UT! post.

Seten, nr 7 på kartet, vart nymerka og tilrettelagt hausten 2025. Turen startar på Brekke i Syvde og går først opp den flotte Hesteråsa før den held fram langs eit langt steingjerde. Siste del av turen er bratt. Toppen av Seten er veldig nær bygda, og er eit ekstra flott utsiktspunkt over Syvde. Seten er Stikk Ut! post i år, og ein finn turen i Stikk UT! appen. Trykker ein på den grøne Stikk UT! knappen i appen får ein og info om alle andre registrerte turar i Vanylven.

Røfsdalsnipa, nr 15 på kartet, er nymerka i år. Turen startar frå den inngjerda parkeringsplassen på enden av vegen gjennom Røfsdalen. Første del av turen går mot Lisjerøfsdalen, men når ein kjem opp Reset til den flatare "inngangen" til Lisjerøfsdalen er det skilta til høgre, mot Lisjerøfsdalen Rundt og Røfsdalsnipa. Følg blåmerka sti til brua over Røfsdalselva og hald fram til høgre over nokre myrar som er klopplagde. Råsa går vidare i tørt terreng gjennom bjørkeskog og lyngmark. Toppen har spesielt flott utsikt mot den alpine delen av fjella i Vanylven og austover.

Utsikta frå Seten over Syvde er ingenting å klage over.

Turen til Røfsdalsnipa er nymerka og vi håper at den vert populær blandt nye og meir erfarne fjelltrimmerar.

Sesongen 2024-2025 vart John Willy Klungre årets fjellbukk og Tone Drage Sørdal årets fjellgeit. Medan John Willy med 176 turar har oppnådd heile 2380 poeng i fjelltrimmen, har Tone med 143 turar oppnådd 1550 poeng.

Evelyn Midtbø vart uttrekt som vinnar blant medlemmane av idrettslaget som har registrert seg på alle 12 postane. 

Vi gratulerer årets vinnarar og vil oppmode fleire om å registrere seg i fjelltrimmen. 

Her finn du resultatliste for fjelltrimmen 2025 med alle registreringar på idrettslaget sine postar:

Resultatliste fjelltrimmen 2025.pdf

Evelyn Midtbø, John Willy Klungre og Tone Drage Sørdal

Syvde IL startar opp med barneidrett i gymsalen på samfunnshuset. Vi stiller med dyktige instruktørar og mykje nytt utstyr. 

Tidspunkt

Onsdagar i oddetalsveker.

Førskule - 2. klasse: 17:15-18:00

3.-5. klasse: 18:15-19:00

På fyrste økt onsdag 22.10 var vi heldige som fekk besøk av Sissel Kragset Vik frå Sparebanken Møre som kunngjorde at idrettslaget hadde fått tildelt 20 000 kr i TEFT-midlar knytt til oppstarten av barneidretten. Vi er svært takksame for at Sparebanken Møre også i denne omgang støttar opp om aktivitetane til idrettslaget. Tidlegare i haust fekk Syvde IL melding frå Tussa om at vi også i år fekk tildelt sponsormidlar. I år fekk vi tildelt 5000 kr som skal gå til det nyoppretta tilbodet for dei yngste. 

Styret i Syvde IL er svært takksame for den støtta vi har fått og lover at midlane skal brukast til å gjere tilbodet til barn og unge i nærområdet best mogleg. 

Per-Magne Sørdal frå Syvde IL og Sissel Kragset Vik frå Sparebanken Møre

Søndag 25. mai arrangerte Syvde IL fellestur til Høgenipa 1097 moh. Vermeldingane hadde vore litt skiftande angåande denne dagen, men veret vart betre enn meldt. Totalt var det 18 personar frå 5 av bygdene i Vanylven som var på toppen av Høgenipa. Praten går lett på slike fellesturar, og den sosiale biten er ein viktig del av turen. Det var også god spreiing i alder med den yngste på 8 år, og den eldste på 77 år. Takk til Vanylven idrettsråd og Frivilligsentralen for initativ til å få i gang igjen desse fellesturane i fjellet.

Foto: John Willy Klungre